31.6 C
Sarajevo

Kako odabrati ime za firmu ili brend ?

Možete svom novom projektu dati neko privremeno ime i krenuti da radite, a vremenom se možda pojavi prava ideja, a evo nekoliko ideja kako odabrati ime za firmu

Da li ste imali prilike da nekada date ime nekome ili nečemu? Nije ni malo jednostavno. Kako Spajdermen kaže – uz veliku moć, dolazi i velika odgovornost. Prosto, jednom kada date nekome ili nečemu ime, ono će takvo ostati trajno. Ne pristupaju svi ovome sa podjednakom dozom ozbiljnosti i odgovornosti. Ime ne određuje uspjeh, ali svakako može da pomogne ili odmogne. Mnoga poznata lica iz Holivuda u dokumentima se zovu potpuno drugačije nego što ih mi znamo decenijama unazad.

Ipak, nešto je drugačije kada pričamo o imenima za firmu ili brend. Ona bi na neki način trebala da predstavljaju vrijednosti i budu jasna asocijacija na ono o čemu se radi. Nerijetko, doduše, kompanija može da nosi ime osnivača ili njegove porodice – recimo Jack Daniel’s ili McDonald’s. Samostalno ili uz neki dodatak. Može to biti i više imena, ako je više osnivača – recimo Smith & Wesson ili Rolls-Royce. Nekada od imena i prezimena nastane amalgam, odnosno skraćenica koja postane riječ za sebe – recimo Adidas ili Brabus. Nekada to može biti transliteracija imena ili prezimena na neki jezik ili adaptacija – na primjer Bulgari ili Casio.

Kako odabrati ime za firmu
Kako odabrati ime za firmu

Nekada su u pitanju skraćenice nekih termina kao kod Microsoft ili Verizon. Nekada je u pitanju akronim – npr HP ili IKEA ili BMW. Nekada brend preraste lokaciju u kojoj je nastao, ali ostane prepoznat – recimo New York Times ili Fuji. U posljednje vrijeme neke kompanije dobijaju imena po onomatopejama – recimo Twitter ili Meow Mix.

Svako od pomenutih imena zvuči jako cool. Baš odiše onim što brend predstavlja. Ali to nije zbog toga što je to ime cool, već zbog toga što je brand toliko jak da kod nas izaziva te emocije. Jer, kakve veze jabuka ima sa onim što predstavlja Apple? Suštinski nikakve. Pa opet, kada vidimo nagriženu jabuku ili neko pomene Apple, slika u našoj glavi je jasna. Ferrari je samo prezime osnivača kompanije, pa opet, crvena boja i konjić koji se propinje nose mnogo drugačiju sliku sa sobom. Za to je potrebno vrijeme, reputacija koju ćete godinama graditi. Blackberry je proslavio kupinu, Apple – jabuku, naročito McIntosh jabuku, Jeep je zahvaljujući istoimenoj kompaniji postao generički termin koji koristimo za takav tip vozila, a na našim prostorima frižider zovemo tako zbog kompanije Frigidaire.

Kako odabrati ime za firmu
Kako odabrati ime za firmu

Onda kako odabrati ime za firmu ili brend?

Za početak, ime nije previše bitno. Možete svom novom čedu dati neko privremeno ime i krenuti da radite, a vremenom se možda pojavi prava ideja. U svakom slučaju, ako vas nešto vuče da pokušate, nemojte čekati idealno ime. Ni jedan brend nije stvorilo njegovo dobro ime, već ono što predstavlja. Moćno ime ispred slabog brenda ne znači previše. „Slabašno“ ime uz jak brend postaje moćno.

Rekli smo da je u pitanju kompleksan zadatak, stoga evo nekih stvari koje možete uzeti u obzir kada razmišljate o imenu:

  1. Prije nego što neko ime uzmete u obzir provjerite da li postoji i da li je na spisku zaštićenih žigova.
  2. Ime koje razmatrate treba da bude jasno za izgovor i pisanje. Ovo nije neophodno, ali svakako pomaže da vas ne mešaju ni sa čim drugim dok rastete. Kasnije će ljudi naučiti, kao što su naučili kako se piše Flickr.
  3. Pokušajte da pronađete ime koje je kratko i jednostavno. Ime je ono čime se predstavljate, nema potrebe da taj stresan trenutak dodatno komplikujete.
  4. Ukoliko je opsino i ne odnosi se na osnivače, ime bi trebalo da na neki način predstavlja asocijaciju na vrijednosti brenda.
  5. Provjerite sa potencijalnim kupcima, da li i njima ime rezonira na sličan način kao vama. Iako je bitno da se i vi dobro osjećate, važni su i kupci.
  6. Provjerite da li na glavnim stranim jezicima to što ste smislili ima neku negativnu konotaciju. Ovo je nešto na čemu su mnogi veliki brendovi padali godinama unazad.
  7. Iako nije loše koristiti tuđe ideje za inspiraciju, nemojte pokušavati da iskopirate neki postojeći brend.
  8. Provjerite da li je internet domen koji sadrži ime koje želite slobodan. Ukoliko je internet važan kanal za vas, ovo može biti veoma bitno.

I ne brinite… Ideja će se pojaviti.

Vama ili nekome iz tima, kada dođe vrijeme.

0 0 Glasovi
Article Rating
Pretplatite se
Obavijesti o
guest
0 Komentari
Ugrađene povratne informacije
Pogledajte sve komentare